બાળપણ ના દિવસો ની મજા જ કંઈક અલગ હતી.
જેમાં દુશ્મની ની જગ્યાએ ફક્ત કિટ્ટી હતી,
ફકત બે આંગળી જોડવાથી દોસ્તી થઈ જતી.
બાળપણ ના દિવસો ની મજા જ કંઈક અલગ હતી.
માત્ર હાર-જીત ની રમતો ની હોડ હતી,
નહીં કે પદ- પૈસા પાછળ ની દોડ હતી.
બાળપણ ના દિવસો ની મજા જ કંઈક અલગ હતી.
રામ – સીતા ની ચોકડી માં જગ્યા બુક થઈ જતી,
આજ ખુરશીઓ મળે પણ જગ્યા કાયમ નથી.
બાળપણ ના દિવસો ની મજા જ કંઈક અલગ હતી.
ટાયર ને લાકડી મારતા ગાડી ક્યાંય પહોંચી જતી,
આજે ગાડીઓ દોડે છે પણ મંઝિલ નથી મળતી.
બાળપણ ના દિવસો ની મજા જ કંઈક અલગ હતી.
વાહનો ની ટ્યૂબ પહેરી પાણી માં તરવાની મજા હતી,
યુ-ટ્યૂબ માં ડૂબી ને આજે યુવાની પુરી થઈ જતી.
બાળપણ ના દિવસો ની મજા જ કંઈક અલગ હતી.
મિત્રો ને શોધવામાં સંતાકૂકડી ની રમત પુરી થઈ જતી,
આજે સાચા સબંધો શોધવામાં ઉમર પુરી થતી.
બાળપણ ના દિવસો ની મજા જ કંઈક અલગ હતી.
ઠેકડા મારી કુંડાળા દાવ રમવાની મજા હતી,
વહેમો નાં કુંડાળા માંથી આજ બહાર જવાતું નથી.
બાળપણ ના દિવસો ની મજા જ કંઈક અલગ હતી.
લોલીપોપ કોઈ આપે તો ચહેરા પર ખુશી આવી જતી,
આજે મોંઘી વસ્તુઓ મળે પણ માંગ પુરી થતી નથી.
બાળપણ ના દિવસો ની મજા જ કંઈક અલગ હતી.
જવાબદારી નાં પોટલાં બાજુ પર મૂકી એકવાર,
ફરી બાળપણ જીવવાની ઈચ્છા જતી નથી.
બાળપણ ના દિવસો ની મજા જ કંઈક અલગ હતી.
– અલ્પા સાતા